ဘယ်သူသတ်တာလဲ?
တစ်ခါတုန်းက ပညာရေးဌာနမှ စစ်ဆေးရေးအရာရှိတစ်ယောက်ဟာ နယ်မြို့လေးတစ်မြို့မှာရှိတဲ့ စာသင်ကျောင်းတစ်ကျောင်းကို စစ်ဆေးဖို့ ရောက်လာခဲ့ပါတယ်။ အတန်းတွေ တစ်ခုပြီးတစ်ခု လိုက်လံစစ်ဆေးရင်း ကျောင်းသားလေးတစ်ယောက်ကို မေးလိုက်တယ်။
"နတ်သျှင်နောင်ကို ဘယ်သူသတ်သလဲကွ"
ကျောင်းသားလေးက အတော်လေးကြောက်ရွံ့သွားပါတယ်။ အသံတွေတုန်ပြီး
"ကျွန်... ကျွန်တော် မသတ်ဘူး" တဲ့
ပညာရေးအရာအရှိဟာ ကလေးရဲ့ပညာရေးအခြေအနေအပေါ် အတော်ကလေး မကျေမနပ်ဖြစ်သွားပြီး အတန်းပိုင်ဆရာမကို လှည့်ကြည့်လိုက်တယ်။အတန်းပိုင်ဆရာမလည်း ကျောင်းသားလေးအတွက်စိတ်ပူပြီး ကျောင်းသားလေးဘက်က ကာကွယ်ပြီးပြောလိုက်တာက…
"ဒီကျောင်းသားလေးဟာအတန်းထဲမှာသိပ်အေးပါတယ်။ ကျောင်းသားအချင်းချင်းတောင် ရန်ဖြစ်တာမရှိပါဘူး။ သူသတ်တာတော့ မဟုတ်နိုင်ဘူး ထင်ပါတယ်ရှင်" တဲ့စစ်ဆေးရေးအရာရှိလည်း ဘာမှဆက်မပြောတော့ ပဲ ကျောင်းအုပ်ကြီးကို ရုံးခန်းမှာဒီအကြောင်း ပြောပြလိုက်တယ်။ စိတ်ဆိုးမာန်ဆိုးလည်း ဖြစ်နေတာပေါ့။ဒီတော့ ကျောင်းအုပ်ဆရာကြီးလည်း တောင်းတောင်းပန်ပန်နဲ့ ပြောရှာပါတယ်။
"စိတ်တော့မရှိပါနဲ့ဗျာ။ ဒီကျောင်းဆရာမလေးနဲ့ ကျောင်းသားလေးဟာ ကျွန်တော်နဲ့ တစ်ရပ်ကွက်ထဲ နေကြတာပါ။ အလွန်ရိုးအေးပါတယ်။ သူတို့ကို ဒီကိစ္စနဲ့ ပတ်သက်ပြီး သံသယမရှိစေချင်ဘူးဗျာ။ ကျွန်တော်ကိုယ်တိုင် အာမခံပါတယ်။ သူတို့ ကျူးလွန်တာတော့ လုံးဝမဖြစ်နိုင်ပါဘူး ခင်ဗျာ"
ပညာရေးအရာရှိလည်း ဘာမှဆက်ပြောမနေတော့ပဲ မျက်စိမျက်နှာပျက်ပြီး ပြန်သွားပါတယ်။နောက်တော့ ဖြစ်ကြောင်းကုန်စင်ကို ပညာရေးဝန်ကြီးဌာနဆီ စာတင်လိုက်သတဲ့ဒီလိုနဲ့ မကြာခင် ၀န်ကြီးဌာနက အခုလို စာပြန်လာပါတော့တယ်။
"နတ်သျှင်နောင် သေတာလည်း ကြာပါပြီ။ နောက်ထပ် စုံစမ်းစစ်ဆေးမှုတွေ လုပ်မနေပါနဲ့တော့" တဲ့
အဲ့စာရောက်ပြီးနောက်မှာ ပညာရေးအရာရှိဟာ ပညာရေးဝန်ကြီးဌာန သို့ နှုတ်ထွက်စာပေးပို့လိုက်ပါတယ်။
KKK (Beetalk)
အောင်မြင့်မြတ်(Myanmar Youths)
Post a Comment